Cyfamod Rhyngwladol ar Hawliau Sifil a Gwleidyddol (ICCPR)

Mae’r Cyfamod Rhyngwladol ar Hawliau Sifil a Gwleidyddol (ICCPR) yn gytuniad rhyngwladol ar hawliau dynol a fabwysiadwyd gan y Cenhedloedd Unedig ym 1966. Cytunodd y DU i ddilyn ICCPR yn 1976. Mae’n galluogi pobl i fwynhau ystod eang o hawliau dynol, gan gynnwys y rheini’n ymwneud â:

• rhyddid rhag artaith a thriniaeth neu gosb greulon, annynol neu ddiraddiol arall
• hawliau treial teg
• rhyddid i feddwl, crefydd a mynegiant
• preifatrwydd, cartref a bywyd teuluol
• cydraddoldeb a pheidio â dioddef gwahaniaethu

Archwiliodd y CU ddiwethaf ar ba mor dda mae’r DU yn rhoi’r ICCPR ar waith ym mis Mehefin 2015 a chyhoeddodd ei argymhellion ym mis Awst 2015. Roedd y rhain yn cynnwys:

• sicrhau bod unrhyw ddeddfwriaeth a basiwyd i ddisodli Deddf Hawliau Dynol 1998 yn cryfhau amddiffynfeydd dros hawliau dynol yn y DU
• cynnal cydbwysedd digonol rhwng diogelwch cenedlaethol ac atebolrwydd dros gamdriniaethau hawliau dynol a honnir iddynt gael eu cyflawni gan Luoedd Prydain
• cryfhau ymdrechion i atal hiliaeth a senoffobia
• cryfhau mesurau i atal trais yn erbyn menywod a merched
• gweithredu i atal rhag hunanladdiadau a hunan niweidio gan oedolion a phobl ifanc yn cael eu cadw’n gaeth gan y wladwriaeth
• sefydlu terfyn amser ar gadw mewnfudwyr yn gaeth mewn dalfeydd, a sicrhau bod diwygiadau i’r system hawliadau carlam yn cydymffurfio’n llawn â chyfraith hawliau dynol rhyngwladol
• adolygu’r cyfreithiau gwyliadwriaeth fel bo unrhyw ymyriad â’r hawl i breifatrwydd yn gyfreithiol, cymesur ac yn angenrheidiol