Perfformiad, hyfforddiant a datblygiad 

 

English Language Version : Performance, training and development

 

 

Gall arfarniadau ac adolygiadau rheolaidd roi cyfle i chi gael sgwrs gyda’ch rheolwr ynglŷn â thasgau neu gyfrifoldebau newydd penodol ac unrhyw addasiadau neu gymorth y gall fod ei angen arnoch chi. Efallai hefyd y byddwch chi am drafod hyfforddiant neu ddyrchafiad. Gall fod yn amser da i gael sgwrs ynglŷn â’r ffordd y mae eich anabledd neu gyflwr iechyd chi yn cael ei reoli yn fwy cyffredinol yn y gwaith a chrybwyll unrhyw ffyrdd y gall fod wedi cyfrannu at eich llwyddiannau.

Dylai’ch rheolwr llinell sicrhau bod y gwaith papur a’r cyfarfod yn hygyrch i chi a bod gennych chi ddigon o amser a gwybodaeth i baratoi.

Hyfforddiant

Mae anghenion hyfforddiant a datblygiad yn cael eu nodi fel rhan o’ch arfarniad/rheoli llinell fel arfer. Un o’r ffyrdd pwysicaf y gall eich cyflogwr gynorthwyo’ch datblygiad yw trwy hyfforddiant, a dylai wneud yn siŵr y gallwch chi ddilyn yr holl hyfforddiant sydd yn cael ei gynnig i weithwyr cyflogedig eraill. Dylai wneud hyn trwy ymgynghori â chi ar y ffyrdd gorau o wneud hyfforddiant yn gynhwysol, megis anfon taflenni atoch chi cyn y diwrnod, darparu mentora dilynol, cael egwyl yn amlach neu ddarparu hyfforddiant dros gyfnod hirach o amser.

Mae’ch cyflogwr yn gyfrifol am wneud yn siŵr bod darparwyr hyfforddiant yn cydymffurfio â gofynion y DGSA.

Dyma sut y gellir addasu hyfforddiant:

  • hyfforddiant un i un ar gyfer rhai tasgau;
  • addasu’r mynediad ffisegol i leoliadau hyfforddi;
  • gwell golau;
  • gwell arwyddion;
  • addasiadau i lety preswyl;
  • amserau gwahanol ar gyfer cyrsiau;
  • newid arddull cyflwyniad; neu
  • gadael i’r hyfforddai gael cynorthwy-ydd gofal personol.

Mae’n bwysig hefyd eich bod chi’n gallu cymryd rhan lawn yn holl ddigwyddiadau’r gwaith, cyfarfodydd tîm, briffio e-bost a diwrnodau cwrdd i ffwrdd. Eto, efallai y gallwch chi roi cyngor ar y ffordd orau o wneud hyn. Mae rhai addasiadau posibl yn cynnwys defnyddio meddalwedd ‘mapio meddwl’ i ddarparu gwybodaeth, trefnu cyfarfodydd tîm â chyfieithwyr iaith arwyddion a threfnu lleoliadau a thrafnidiaeth hygyrch ar gyfer diwrnodau cwrdd i ffwrdd.

Efallai hefyd y bydd angen i chi gael hyfforddiant wedi’i lunio’n arbennig ar eich cyfer chi: er enghraifft, er mwyn defnyddio unrhyw addasiadau neu offer arbennig a ddarparwyd, neu ail-hyfforddi i’ch cynorthwyo i aros yn eich swyddogaeth gyfredol neu addasu i swyddogaeth newydd.

Ennill cyflog wrth ddysgu

Mae prentisiaethau modern ar gael i bobl ifanc 16-24 oed. Maen nhw’n para rhwng blwyddyn a thair blynedd a gallant eich cynorthwyo chi i gael profiad ymarferol o weithio, ennill cymwysterau ac ennill arian ar yr un pryd.

O safbwynt y cyflogwr maen nhw’n gyfle i wella sgiliau’r gweithlu a chadw staff da.

Mae Dysgu Seiliedig ar Waith yng Nghymru a Lloegr (Hyfforddi ar gyfer Gwaith yn yr Alban) yn ffordd gadarnhaol o hyfforddi neu ennill profiad gwaith gwerthfawr yn gysylltiedig â’r gwaith rydych chi am ei wneud.

Gall eich cynorthwyo chi i gael swydd, dysgu sgiliau cysylltiedig a / neu ddysgu am hunangyflogaeth. Mae hyfforddiant sylfaenol ar gael hefyd i bobl sydd angen cymorth ychwanegol i ddod yn fwy cyflogadwy.

Cynllun ar gyfer y rhai dros 25 oed yw hwn yn bennaf, ond gall rhai pobl anabl fod yn gymwys o 18 oed ymlaen.

Byddwch chi'n cytuno ar gynllun hyfforddi i fodloni’ch anghenion penodol. Tra byddwch chi’n hyfforddi byddwch yn cael lwfans sy’n cyfateb i unrhyw fudd-dal y mae hawl gennych chi ei chael yn ogystal â £10 yr wythnos, a chymorth hefyd o bosibl ar gyfer treuliau megis teithio a gofal plant.

Os cewch chi gynnig swydd cyn gorffen hyfforddi, efallai y byddwch chi’n dal i allu cwblhau’r cynllun hyfforddi y cytunwyd arno.

On this page

 

Iechyd a diogelwch yn y gweithle

Os oes gennych chi anabledd neu gyflwr iechyd, mae Deddf Iechyd a Diogelwch yn y Gwaith 1974 a’r DGSA yn eich diogelu chi. Bydd adegau pan fydd swydd neu dasg arbennig yn achosi’r fath risg iechyd a diogelwch i chi fel nad yw hi’n rhesymol i gyflogwr adael i chi ei chyflawni.  Ar y llaw arall, prin yw’r enghreifftiau o’r fath a ni ddylid fyth defnyddio iechyd a diogelwch fel esgus ffug dros beidio â’ch cyflogi neu beidio â pharhau i’ch cyflogi chi.

O dan Ddeddf Iechyd a Diogelwch yn y Gwaith rhaid i gyflogwyr, cyn belled ag sy’n rhesymol ymarferol, sicrhau iechyd, diogelwch a lles pob gweithiwr cyflogedig. Rhaid i bob cyflogwr asesu risg y gweithgareddau y mae gweithwyr yn eu cyflawni. Mae’r model asesu risg yn ystyried y risgiau ychwanegol i rai grwpiau o weithwyr. Efallai y byddwch chi, fel unigolyn anabl, yn perthyn i’r categori hwn. Os bydd eich cyflogwr yn meddwl bod unrhyw berygl iechyd a diogelwch yn gysylltiedig â’ch recriwtio neu’ch cadw chi, yna mae’n rhaid iddo ystyried addasiadau rhesymol o dan y DGSA.

Mae ansawdd yr asesiad risg yn allweddol. Efallai y bydd angen i’ch cyflogwr ddefnyddio staff arbenigol a rhaid i’r sawl sy’n asesu:

  • ganolbwyntio arnoch chi fel unigolyn, nid pobl â’ch cyflwr chi’n gyffredinol;
  • ystyried y ffeithiau;
  • peidio â rhagdybio;
  • cael cyngor meddygol penodol unigol; a
  • siarad â chi ynglŷn ag unrhyw addasiadau rhesymol y gellir eu gwneud.

Hefyd, dylai’r asesiad risg ystyried elfennau hanfodol y swydd; am ba hyd y mae unrhyw sefyllfaoedd peryglus yn parhau a pha mor aml maent yn codi; ac unrhyw addasiadau rhesymol y gellir eu gwneud i leihau’r risg.

Os oes yna risg annerbyniol o hyd, hyd yn oed ar ôl gwneud addasiadau, gallai’r cyflogwr yn gyfreithlon eich diswyddo neu beidio â’ch cyflogi. Y cwestiwn sy’n codi yw beth sy’n ‘annerbyniol’: a dim ond y llysoedd all roi hyn ar brawf. Fwyfwy mae cynsail cyfraith achos yn cael ei sefydlu sy’n rhoi canllawiau pellach i gyflogwyr.

Mae’r penderfyniad ynglŷn â’ch cyflogi neu eich cadw mewn swydd yn nwylo’r cyflogwr. Os bydd yn gofyn am gyngor arbenigol gan y gwasanaethau meddygol neu arbenigwyr iechyd a diogelwch, bydd y rhain yn asiantwyr i’r cyflogwr, ac mae’n ddyletswydd ar y cyflogwr i sicrhau bod yr arbenigwyr wedi ystyried y ffeithiau i gyd.

Os oes gennych chi neu’ch cyflogwr bryderon am eich iechyd a’ch diogelwch, cysylltwch â’ch cynghorydd iechyd a diogelwch, yr Awdurdod Gweithredol Iechyd a Diogelwch  neu’r Fforwm Cyflogwyr ar Anabledd.


Back to top^  

Peryglon tân a lifftiau

Un peth y mae cyflogwyr yn pryderu amdano’n aml wrth ystyried cyflogi unigolyn anabl yw beth fyddai’n digwydd yn achos tân. Diffyg gwybodaeth sy’n sail i hyn yn aml, gyda chyflogwyr yn meddwl yn anghywir na ddylid cyflogi defnyddwyr cadair olwyn am na fydden nhw’n gallu dianc o adeilad sydd ar dân pan nad yw’r lifftiau’n gweithio. Gall pobl wahaniaethu yn erbyn pobl fyddar, rhai sydd â nam ar eu clyw a phobl ddall hefyd am eu bod o’r farn anghywir na fyddan nhw’n gwybod bod larwm tân yn canu neu y byddan nhw o bosibl ‘dan draed’ cydweithwyr sy’n ceisio dianc.

Os oes gennych chi anabledd a all achosi anhawster yn ystod tân yn eich gweithle, mae angen i chi gael trafodaeth a chytuno ar gynllun gyda’ch rheolwr llinell a/neu reolwr y safle ynglŷn â hyn. Efallai bod yna newidiadau syml iawn y gellir eu gwneud i atal hyn rhag bod yn broblem:

  • darparu goleuadau sy’n fflachio fel larymau, yn ogystal â phethau sy’n gwneud sŵn;
  • gwneud yn siŵr bod gan gydweithwyr sy’n gweithio gyda phobl fyddar ymwybyddiaeth sylfaenol o iaith arwyddion a materion yn ymwneud â byddardod;
  • sefydlu system gyfeillio i sicrhau bod defnyddwyr cadair olwyn yn cael cymorth mewn argyfwng;
  • neilltuo tywyswyr wedi’u henwi ar gyfer unigolyn sydd â nam ar y golwg yn achos tân;
  • darparu mannau lloches dros dro i ddefnyddwyr cadair olwyn wrth ymyl drysau gwrthdan ac sydd â llwybr diogel i’r allanfa derfynol (efallai y bydd modd cyfathrebu â phwynt rheoli canolog o’r lloches hefyd); neu
  • hyfforddi staff yn y cynlluniau ar gyfer gwacáu’r safle.

Dylai’r holl staff dan sylw fod yn ymwybodol o’r cynlluniau hyn a dylid eu profi’n rheolaidd. Dylai cynllun gwacáu sydd wedi’u bwyso a’i fesur yn ofalus ystyried pob unigolyn yn yr adeilad, gan gynnwys, er enghraifft, menywod yng nghamau olaf beichiogrwydd. Yn aml iawn gall hyn gynorthwyo i wella gweithdrefnau a diogelwch yn gyffredinol.

Efallai y byddwch chi am drafod eich anghenion yn gyfrinachol, ac os felly dim ond rhai unigolion allweddol fydd ag angen gwybod am eich cynllun unigryw.


Back to top^